Mn_SoKKaRaTy
Sunday, April 01, 2007
معاناة السينما في العالم العربي
أدري وايد من حبايبنا كتبوا عن هالموضوع لكن من حرتي على هالشي إللي صار
رحت السينما ذاك اليوم وطبعا كل روحة قصّة
مرة يت مره كبيرة شوي يايه مع بناتها بلشتنا من دشّت واهي حنّه وبناتها مايدرون عنها قعدَت يم اختي واشتغلت الحنه طبعا ماندري عن الفلم المعروض لأنا لاهين بالفلم الثاني إللي يمنا مسكينة اختي والله كل ما انسجمت شوي قالتلها مسكي النفيش وعقبها مسكي البيبسي وبعدين عقب ماخلّصت من الأكل عليها بالعافيه قامت تسوي شي ماني ملوعة جبدكم لأنها لوعت جبدنا الله يهداها يعني الفلم أجنبي شيايبج بالنهاية اكتشفنا إنها مو قاعدة يم بناتها واهم كاشتين فيها الاخت قاعدة مكان غلط .. لووووووووول صج هذا وما خفي من التفاصيل أعظم
عاد أقولكم ذاك اليوم قعدت جدامي وحدة بالذمة شوفوا راسها بالصور ماشفت من الفلم شي وكل شوي متحركة أقولها لوسمحتي حولتيني تقولي عاد ما أشوف شسوي والجذابة مافي أحد جدامها قلت خلأسكت مابي مشاكل ولسان حريم قطيعة المهم صار سايلنت باللقطة وشحلاتنا انسجمنا شوي ولاّ ماتسمع إلا خشخشخشخشخش وجاك جاك قطيعة شهذا الأخوان فيران مو أوادم والله لووووعة هيلق يعني يايين تبلعون ولاّ تشوفون الفلم وتستمتعون بلقطاته شهالناس ولاّ إللي معاها كل شوي قايمين شنو فقر يعني لازم تاكلون أوفيييييه لوعة بلوعة العرب والله لاااا وإيييكم واحد مليق ولاّ وحدة أملق شايف الفلم من قبل ويقول القصة والأحداث يعني شهالتفلسف يعني شكو رايحين مرة ثانيه تشوفونه إنزين آنا دافعة فلوس عشان أشوف الفلم وأستانس يعني ليش النكد أوووووف صج عرب والله برة موجذيه ذرابه بكل شي حتى بأكل النفيش لاصوت ولافيران يمكم قطييييييييييعة
-
posted by ana_sokkarah at 9:01 PM
.JPG)
22 Comments:
عاد الفيلم هذا يبيله اندماج عشان تستمتعين بالتصوير
لانه التصوير قمة
اكثر شي ينرفزني لما اروح السينما
ومادري ليش حظي لما اروح لازم احد حواليني يتكلم ويشرح الفيلم
صج نرفزة وحرق الاعصاب
عاد انا ما استحي بهالسوالف
اذا احد تكلم يمي اقوله لو سمحت ممكن تسكت بندمج بالفيلم
بعد الناس ليش تيي السينما
انا ما يبط جبدي وينرفزني الا اللي يقعد وراج ويرفس كرسيج
والتعليق على لقطات الفيلم
يخليني اتنرفز
وطبعا ما اندمج بالفيلم
هههههههههه
دايم تصير انك تلاقين ناس المفروض
يمنعوهم من دخول السينما ..لكن
ما باليد حيلة نمنعهك من دخول مكان
عام..
الله يعين صج في ناس ما تستحي جنه الفلم لهم ولا قاعدين في بيت ابوهم
تحياتي
الصراحة اول مرة اعلق عندج يمكن او من زمان اذا انتى نفسها اللى قبل تكتب
مت من الضحك يمكن لو انا جان كافخ المرة على راسها لان ما اتحمل خصوصا انا وايد اتأثر واندمج بالسينما وادخل جو
والحين الساعة 10:15 بروح اشوف فيلم 300
خوش بوست :)
مشكورة :)
لووووووووووووووول
واى مت مت ضحك اهم شى الراس الى مصورته
ههههههههههههههههه
اى ينرفزونج
انا مره قعدت يمى وحده ريحتها اتييب اليهد طول الفلم انا دافنه ويهى بهدومى شسوى
ما الومج
ولووووووووول على الى مضيعه
واى شهالحظ
ههههههههههههه
هذا غير اللي يضحكون و يعلقون بصوت عالي
و الا اللي وراج بالكرسي و يندح فيج طول الفلم و الواحد يستحي يقول شي
بس والله ضحكت على الصورة من صجج قاعد ه تصورين راسها
LOL
الحين اللي صار ينرفزني اكثر الفلم مامداج تندمجين الا قطعوا عليج حتى لو مافيه شي !! و مايعرفون يقطعوووون
واااااااااااي لا ذكرتيني بالمعاناة اللي صارت لي انتي اذا راسها صاك عليج انا ريل اللي ورى نرفزتني اشوه مو حامل جان صار بالجنين ارتجاج اخر شي لفيت راسي عليه قلت له وبعدين يعني متى ريلك بتوقف من التطقطق هههههه طبعا ما ادري اشلون كلمته جذيه لاني تنرفزت كل اللي قاله اسف اسف
يا معوده خليها على الله
هههههههههه
بصراحة أول شي أنا شكيت بأمي
بس لما قلتي بيبسي ونفيش
وتاكل وعقب ما خلصت سوت شي
يلوع الجبد
:))
قلت لا مو هي ظلمتها
لأنها ما تاكل لا نفيش ولا تشرب بيبسي
ولا تسوي شغلات تلوع الجبد
ولما شفت راسها قلت لا أكيد مو هي
لأن أمي مو طويلة علشان تسد على
اللي وراها
:))
صج في ناس يلوعون الجبد بالسينما
يطلعون الواحد من طوره ويكسرون عليه
اندماجه
شنو اتنرفز اذا واحد قعد يسولف
وأنا مندمج
عاد انا اذا اندمجت لحد ايي صوبي
أو يكلمني لأن عادي أكشت فيه ولا ألقييه ويه
ودمتم بحب ومتعة سينمائية
خوش صورة .. ضحكتني حيل والله .. وعشان جذي أنا دايما أحجز بالصف الأول بالنص ( في القاعات اللي تكون مدرج نص جدام ونص فوق .. أحجز أول واحد وجدامي الممر ) علشان محد يقعد جدامي
PearL
إي والله شفتي.. ماشاءالله عليج آنا ماعندي الجرأه أتكلم أتحلطم على أختي واهي تزفهم إهي شوي أجرأ مني بس تدرين زين تسوين يختج احنا نروح السينما عشان نشوف الفلم بس الناس يروحون عشان يبلعون ويقرقون ويتحولون فيرااااان تخشخش بهالنفيش والناتشوز أووففففف متى تنتهي هالظاهرة يعني
شكرا لتواصلج عمري
Mamloo7a Q8ia
هاهاهاي تكفين حتى لوكانوا يهال عفيه أهل مايزفون ولا يقولون حق عيالهم عيب مخلينهم يرافسون جنهم ببيتهم ولايدرون عنهم قطيعة يوم الأربعاء رحت فلم مستر بين لجونا اليهال الفلم حلو ويضحك بس اليهال نرفزوني طبعا موعيالنا لأ عيال العالم أوفيييه عليهم
شكرا لزيارتج حبي
محمد بن سالم
أخييييه ياخوي محمد لو نمنعهم صج.. تصدق خوووش فكرة بقترحها عليهم جان زين تصير والله
تحياتي لك عزيزي وميرسي أوي عالمرور
غريب
إي والله مادري شالحكمة من هالشي إللي يسوونه هل أهو عدم احترام؟ هل أهو استهزاء بالناس وبس يدورون ازعاجهم بأي طريقة؟ أو لفت انتباه؟ أو أهم هيلق وعمرهم ماشافوا فلم وسينما فيروحوله كذا مرة؟ أو السالفة عناد؟؟ والله مادري
عسى الله يهديهم بعد شنسوي
mishari
هلا فيك والله نورتنا
إمبله هذي آنا ماتغيرت وإنت كنت تعلق عندي من فترة طويله حياك الله عزيزي بأي وقت
لوووووووول يختك ماعشت الموقف بعد وبتكفخها لو عايش صج جان ذبحتها بعد والله تنرفز ويّا ويهها أم صماخ.. عاد في أفلام تحتاج تنسجم فيها أشوى إني أعرف انجليزي وأفهمه عدل ولا جان طافتني الترجمة كلها من صماخها..لوووول
إيييي هذا اهو الفلم بس عاد يوم طلعت نفس اللقطه عاد عسى تذكرت كلامي وتخيلت أم صماااخ..لووول
ممكن العيب بالقاعة والكراسي اللوعة إللي فيها بس هذا مايمنع إنا نعمل حساب غيرنا
حياك الله عزيز وغالي والمكان مكانك يامشاري بأي وقت تنور شكرا لزيارتك
charisma
لووول تدرين لو آنا بمكانج
جان أقوم أوقف عند الباب مع الهنود إللي معاهم الليتات ولاّ تدرين آكل ناتشوز وأهف بويهها يمكن تضيع الريحة وتختنق وتطلع هاهاهاي عيل أخنق نفسي لييييش
واللى مضيعه ماقول إلا الشرهه على بناتها مخلين أمهم بروحها وتايهه والله لو آنا جان أحطها على راسي صج عيال آخر زمن بس اتوقع انهم قاصدين عشان خايفين تفشلهم.. لاحول ولا قوة إلا بالله
حبيبتي والله تسلمين على هالمرور الحلو
Cr8ivia
هي هي إييييي يختج من الهلاقة
إللي فيهم على كل شي يصفقون يصفرون ويحييوون الممثلين لييييش يعني شدعوة بيسمعونكم عاد ألحين أذيتونا عالفاضي عبالكم أيام التايتنيك إللي صج كان فلم صاروخ.. عيل بطّوا جبدي ذالك اليوم (مستر بين) شعليه تصفقون خو إللي أعرفه لازم تضحكووون نااس ملاقة في ملاقة وهلاقة في هلاقة بس شنقول عاد نسكت أحسن جود الله يسلط عليهم أحد يأذيهم بأي طريقه ومايقدروون يقولوله شي
والصورة الله يسلمج عادي طلعت تليفوني وصورتها يختج مومني من اللي فيني تدرين كنت مطلعته عشان أحذفه عليها بس تعوذت من ابليس لوووول
حياج الله عمري
ToFFeY
لووووول يامعودة أنا لو حامل بسكت أخاف بس.. عاد سكت قبل لا أحمل بس وآنا حامل ياويلهم شنو أحكر روحي بالبيت شالسالفة
هاهاهاي غصب عليه حبي يتأسف بعد أذاني والله ياليت تييني الشجاعة أزفهم أتمنى هالشي
ثانكس لمرورج قلبي
sologa-bologa
اهم شي إنك شاك بأمك لووووووووول حلوة هذي تشك بأمك لييييش يعني اسم الله على أمك الله يحفظها ويخليها لكم..أما هذيك تكفه خلني ساكته الله يهديها بس
واااي مثلي آنا ماأرد على أحد أصك الجام بالمرة..أحب أندمج بالقصة ..وااي أعرف وحدة طلعت مرة معاها السينما ماعندها سالفة غير شوفي فلان مع زوجته، إنزين الله يهنيهم وبعدين شسوي.. شوفي هالبنيه شحلاتها، إوكي وت نكست.. شوفي هذا اينن، أوفيييه روحيله.. إنتي ماعندج غير هالسوالف يبه خلي هالقرقة بعدين سبحان الله الناس مااييها وحي السوالف غير لما يبدي الفلم..عقبها ماطلعت وياها كلّش أول وآخر مرة.. شفيهم خواتي اسم الله عليهم والله يخليهم ويحفظهم نطلع ونستانس مع بعض
شكرا لتواصلك عزيزي وسلامي للوالدة الله يحفظها
bo9agr
أشوى عجبتكم الصور.. يختك هذي انزفيت عشانها هي هي.. ياني الهندي من وراي ويحط الليت علي يعني شتسويين طنشته وخذيت الصورة الثانيه جان إيي ويحط الليت بويهي يعني إذا موعاجبج لووول عليه يزفون بعد مادري في أحد يصور الفلم بالموبايل ممكن عندهم مادري شنبي فيه خوقاعد نطالعه لا وانتو آخر عرض بالعالم المتقدم خير يعني.. الحمدلله والشكر تخلّف
خوش مكان مرة وحده لقيته فاضي وحجزت ..آآآ إنت إللي عرجبتلي ذاك اليوم يوم مريت وسكرت عليك آآآ هذا انت يابو صقر هذي سوالفك.. لوووول لا أتغشمر والله عزيز وغالي
تورتنا وأسعدني كثير مرورك يابوصقر
عجبتني اللقطات اللي صورتيها
انتي رايحه تشوفين الفيلم وله تشوفين راسها :-)
اخر مره رحت السينما كان المكان خالي الا من دكتور في الجامعه -عرفته لما افتحوا الانوار
لكن اللي بطوا جبدي القروب اللي قاعدين ورانا كل شوي طاشين طالعين وطايحين سوالف ويسلمون علي اللي يمهم وكأنهم داشين ديوانيه
layal
هلا والله بأهل البحرين كلهم نورتينا ياعمري
إي والله يختج هذول النوعية من الناس هيلق الله وكيلج مومال اندماج سينمائي فقلت أصور راسها عشان أعرفكم على هالنوعية اللي ماتستحي
أي شي إي والله شنو هذول داشين ديوانية والله حاله جان طشرتي عليهم النفيش وحذفتي بويههم مايستحون
حياج الله عمري ويدوووم التواصل ان شاءالله
Post a Comment
<< Home