Mn_SoKKaRaTy

Sunday, September 17, 2006

انقطاعي المفاجئ ..عدت والعود سكّره

مرحبـــــــــــــــا أوووووول شلونكم جميعا انشاءالله بخير؟!! (دوووووم يارب كلكم بخير).. اللهم آمين
في البدايــــة أحب أشكـــر كل من سأل عني في فترة غيابــي ســـواء بالإيميل أوبالإيميل (هي هي .. عادي التكرار فصلة ما بعد الإنقطاع) .. والله اشتقتلكم وايد وايد واشتقت لمواضيعكم الشيّقة .. صج فقدت أعز الأصدقاء.. عسى الله لا يفرقني عنكم
في فتـــرة غيابي صارت لي أحــداث وايد وكلهـــا مو زينة الله يكافينا ويكافيـــكم الشــر (حشى جني اقدم موجز لآخر الأخبار.. هي هي .. يله شنسوي من القهر إللي فيني والله) لكــن الواحد يقول قدّر الله وماشاء فعل والحمدلله على كل حال
تعرفون هذا " المقرود إللي تدوره القراده؟؟" هذا آنا الله يسلمكم حالتي من شي لي شي مو مترقعه كلللللللش .. ولو أعدلكم الأحداث إللي صارتلي وإللي ودّي أفضفض لكم عنها ما راح أخلص .. المهم من آخر الأحداث إللي حدثتلي بيبيتي حبيبتي شبه انعجنت ( أدري لا شفتوا الصور بتضحكون على هالكلمة لكن هذي بيبيتي وبالنسبالي انعجنت انعجان مو طبيعي – يبه حسّوا فيني السيارة غاليه والشلخ فيها يعور القلب وأعتبره حادث فمابالكم بالبلوة العنييييفة إللي بالصور) وتأثرت مسكينه جسديا وآنا نفسيا بالنيابة عنها.. والحمدلله قدّر ولطف فيني وفيها ولاّ جان صرت آنا ويّاها في خبر كان وكل وحدة فينا بمكان إما المكان إللي ماله رجعه أو ننحط على جنب لين تتم التصليحات الجسدية لي ولها .. لكن ولله الحمد ما صار من هذا شي إلا جروح ربع طفيفة لها ونفسية بححححححته لي طبعا .. والمقرود مقرود .. في ذاك اليوم إللي يلوع الجبد من أوّله طلعت من البيت (بس ماقدرت أتذكر بويه منو كنت مصبحة بأي ويه قبّس مادري) .. المهم كنت طالعة متأخرة حق الدوام والكل يدقدق علي من صوب كل ماسكّرت الخط رن مرّة ثانية (حشى رئيس مجلس الوزراء مو سكّرة) .. تدودهت وماجنّه صارلي 12سنه أسوق سياره والله فجأه صرت عليميه .. عقب ما كنت أصارع الرياح (شنو سكّره فلم آكشن ؟! .. هي هي).. المهم من كثر ما القراده ملاحقتني الله يسلمكم وكنت بالضبط عند اللفة وزحمة موووت والساعة 9:30 (ليش مداومه سكّرة بعد ماله داعي ردّي البيت وكملي النومة أحسن) .. عاد صج المخدة كلّش ماكانت لازقه بويهي وشالعة نفسي غصب.. المهم حشاكم الغبي إللي كان جدّامي ميني باص قام وتقلقص بيني وبين الرصيف (شنو مستصغر نفسك حضرتك .. حسبي الله ونعم الوكيل) .. ومن كثر العناد إللي براسي والوقت إللي مداهمني ما أبيه يطوف شنو آنا أنطر كل هالفترة وحضرته إيي بارد مبرّد ويطوف جدّامي (إيه هيّه وكاله من غير بوّاب ولاّ إيه ؟) والله لو طاق إشارة أطوفه وأحترمه مثل ما احترمني لكن استهتار وعدم احترام لأ .. المهم عاد يوم خلّص الشارع وبطلع على الهاي ويي ماشفت الأخ الفاضل إنّه عدّاني .. كنت أطالع يسار .. استانست فضى الشارع وعطيتها أول دوسة (خبركم أول دوسة تصير قوية شوي) ودوووب ولا آنا ويييييييين لامّه الميني باص حسبي الله عليه .. نزلت أشوف الحادث والناس ياسلام زحمة يادنيا زحمة حاشتني دوخة من الحرّة ومن إللي شفته .. ولاّ مو بس اللمه الحلوة إللي لامتها بيبيتي حبيبتي الميني باص (قليلة الأدب.. ياخسارة تربيتي لها كل هالسنين) ؟! أثاري في بلوة بعد .. الأخ المحترم الثاني وإللي وراه كان يحاول يسوّي مثله ويوم لمّت الحلوة الميني باص دعمني على جنب شلون مادري الظاهر من خرعته وخوفه إنّه يدعم إللي جدّامة لف السيارة ولاّ الغبي بايس سيّارتي وماحسّيت فيه لأن الحادث صار 2 بواحد (مادري شفيها سكّرة بس تسوي دعاية للشامبو) .. والصدمة الأكبر الله يسلمكم درت على بيبيتي ولاّ إللي وراي المحترم خاف يعجنّي رزم بريك وسحكلي الله يعافيه السيارة من الزاوية اليسار..ماتتخيلون الموقف أو الحادث شلون صار.. والله آنا مومترقعة مو؟! .. مع إني قلته تقريبا ببطء وبالتفصيل الممل جنّه فلم ماني قايله !! بس هم ماراح تتخيلون شلون هالحادث صار بتسلسل غريب عجيب ..حياتي والله سيارتي كاااااانت كشخه وألحين أنطر طلعتها من المستشفى .. بسوّيلها احتفال ماحصلش وبودّعها وأببيعها وآخذ بنت عمها أحلى وأرز وأعلمها الأصول عدل مو هذي إللي خانت تربيتي لها .. تدرون بالنهاية شسويت مازفيتهم يتني الدوخة قمت وركبت سيارتي خفت أطيح عليهم بالشارع .. وآنا البنت الوحيدة بينهم .. الصراحة خفت من كل شي .. سقت بيبيتي ورحت الدوام ..وقـّعت وطلعت.. السؤال: خو من الأول ردّي البيت ليش تروحين الدوام؟؟ .. الجواب: والله من الحرة والدموع إللي تارسه عيني ماكنت أدري وين رايحة لقيت نفسي بالدوام أوقع وأستأذن من المسؤول وطلعت والكل يسأل شفيج قلت لهم مافيني شي بس بطلع أدري مبّين على ويهي والميكب اعتفس حدّه والفيس المنقلب لا ابتسامه ولا شي ولا حتى سلام أو صباح الخير (الكل يقول بعد عمري سكّرة مادري شفيها).. المهم درت شوي بهالشوارع من الصبح وردّيت البيت.. وهذي قصّة انقطاعي عنكم .. وسوري طوّلت عليكم بس حبّيت أفضفض ولو بالتفصيل الممل عن مأساتي .... هذا شيء من لاشيء.. وما خفي كان أعظمممممممممممم

بالنهاية تمنياتي لكم بأن يحفظكم الله جميعا من كل مكروه وديروبالكم ترى إذا ما علتوا عالوا عليكم
أترككم مع الصور








إيييي لا أنسى .. كل عام وانتو بألف خير ومبارك عليكم الشهر ويعوده علينا بالصحة والعافية يارب أجمعين.. والله يعافيكم كثروا من الدعاء لي مو تنسوني آنا ماراح أنساكم راح أدعيلكم بدوام الصحة والعافية عليكم و أدعيلكم بالتوفيج ..تستاهلون كل خير

وكل عام وانتو بخير وعيدكم مبارك وعساكم من عوّاده

أدري كلّه بالجملة بس لأني راح أنقطع عنكم بهالشهر الفضيل وأرجع لكم بعد العيد انشاءالله

سلامــــــــــــــو

---------------oOo---------------
---------------oOo---------------